No Pleno da Mancomunidade do Val Miñor celebrado no día de onte o Bloque Nacionalista Galego presentou unha moción en relación aos plans de reducción de liñas de autobús realizado pola empresa concesionaria ATSA. Nesa moción reclamábanse os seguintes acordos:

- Solicitar á Dirección Xeral de Mobilidade que promova a realización dun Plan de transporte metropolitano da área de Vigo que mellore a comunicación dos diferentes concellos da comarca con Vigo e entre eles.

- Esixir á empresa adxudicataria o mantemento do actual servizo e solicitar á Direccións Xeral de Mobilidade que se pronuncie no mesmo sentido.

- Que a Mancomunidade de Concellos do Val Miñor promova a creación, con carácter de urxencia, dunha comisión entre a propia Mancomunidade, a Dirección Xeral de Mobilidade e as empresas, co fin de realizar un plan de transporte do Val Miñor que mellore a situación actual e que recolla, entre outras medidas, a inclusión de novos itinerarios, paradas, solución da situación actual de traxectos con Vigo, etc.

- Que a Mancomunidade se comprometa a negociar e impulsar o uso dun billete metropolitano que permita realizar transbordos entre diferentes liñas da mesma ou diferentes empresas no ámbito da comarca de Vigo.

- Que a Mancomunidade negocie coa empresa tarifas reducidas para usuarios habituais, estudantes, persoas xubiladas, etc, procurando as vías necesarias para garantir o apoio económico a esta medida.

A moción aprobóuse por unanimidade, cos votos favorables de representantes do PP, BNG e CDL, xa que non asistiu ningún representante do PSOE.

Moción presentada polo BNG