Os termos “minusvalía” e “minusválidos” deixarán de figurar na ordenanza reguladora do imposto de vehículos de tracción mecánica (IVTM) do Concello de Nigrán ao adoptarse a proposta do BNG para que así sexa.

Estas definicións aínda permanecían na ordenanza e agora serán substituídas polas palabras “discapacidade” e “persoas con discapacidade” aproveitando a nova publicación do texto no Boletín Oficial da Provincia como consecuencia dunha modificación operada sobre el.

Os cambios propostos polo goberno municipal limitábanse a equiparación das declaracións de incapacidade coa situación de discapacidade a efectos de quedar exento do pago do imposto, así como a retirada das bonificacións para turismo con etiquetas “0” ou “ECO” se estes ten 16 cabalos fiscais ou mais.

Sobre esta cuestión o portavoz municipal do BNG, Xavier Rodríguez, lamentou que non se aproveitase para realizar unha reforma máis profunda do imposto que acentuase a súa progresividade “reducindo incluso a cuota anual aos vehículos de menos potencia e aumentando o coeficiente a aplicar aos de alta gama”, xa que ao seu xuízo “a potencia dos vehículos é un axeitado indicador indirecto da capacidade económica dos contribuíntes”.

Non houbo obxeccións ao respecto dos cambios propostos polo goberno, así como tampouco á proposta nacionalista de eliminación dos termos citados, polo que a modificación da ordenanza fiscal foi aprobada por unanimidade.

No BNG esperamos que nun futuro se dean as condicións para abordar unha reforma máis ambiciosa do imposto.